AMA NA NAGLALAKO NG CHICHARON PANTUSTOS SA PAMILYA AT PAG-AARAL, TAGUMPAY NA NAKAGRADUATE SA EDAD NA 41!

 AMA NA NAGLALAKO NG CHICHARON PANTUSTOS SA PAMILYA AT PAG-AARAL, TAGUMPAY NA NAKAGRADUATE SA EDAD NA 41!

Walang paligsahan, walang nauuna at nahuhuli sa pagtatapos ng pag-aaral at tunay ring walang kahirapan ang makakahadlang sa pagkamit nito.

Ito ang pinatunayan ni Jesus Fuentes, isang ama mula sa Barangay Labangon, Cebu City, na pinagsasabay ang paglalako at pagtitinda ng chicharon para sa binubuhay na pamilya at maipangtustos sa pag-aaral at ngayo'y magtatapos na sa kanyang bachelor degree sa edad na 41-anyos. 

Matapos ang hindi na mabilang na mga pinagdadaanang hamon at hindi pagsuko sa pangarap, kahit pa maraming hindi naniwala sa kanyang kakayanan ay nasungkit niya na ang tagumpay sa pinagsisikapang diploma sa kursong Bachelor of Elementary Education mula sa Talisay City College.

Aminado siyang hindi naging madali para sa kanya ang ipagpapatuloy pa ang naudlot niyang pangarap, nagtapos siya ng highshool sa edad ng 22-anyos, at nagkaasawa sa sumunod na taon hanggat nakabuo ng isang pamilya at binibuhay ang 4 nilang anak.  

Nakatira lamang sila sa isang pinagtagpi-tagping bahay, kaya't isinantabi muna ang pangarap magpatuloy ng pag-aaral upang mapunan ang pangangailangan ng pamilya, nagtatrabaho siya sa isang gasolinahan at merchandiser sa isang tindahan. 

Kahit pa sa hirap ng pamumuhay nilang pamilya at sa responsibilidad niya bilang haligi ng tahanan ay hindi niya ibinaon sa limot ang pangarap. Sa edad na 38-anyos, suntok sa buwan ang desisyon niyang magpatuloy ng kolehiyo. 

Mahirap umano sa kanya dahil maging ang kanyang sariling asawa ay hindi siya suportado noong una sa pag-abot ng kanyang pangarap, na aniya'y para lang din naman ang lahat ng ito sa kanila. 

Dala-dala hindi lang ang gamit sa eskwela, pati ang kanyang mga panindang chicharon ay bitbit niya araw-araw upang maialok niya sa tao papasok sa klase at sa mga classmates at mga guro niya. 

Hanggang ngayon ay hindi parin makapaniwala si Tatay Jesus kung paano niya nakayanan at nalagpasan ang lahat ng mga pinagdaanan paghihirap sa apat na taon na pag-aaral at paghahanapbuhay para sa mga anak.