Sa init ng araw at kabagalan ng benta, si Lolo Jose, isang 87 anyos na tindero ng ice cream, ay naupo sa gilid ng kanyang kariton. Alas-onse ng umaga nang mag-umpisa siyang magtinda sa Pardo Public Market sa Cebu City, umaasang makakabenta upang may maiuwi para sa kanyang pamilya.
Lumipas ang mga oras, at alas-kwatro na ng hapon ngunit halos puno pa rin ang kanyang lalagyan ng ice cream. Sa bawat pagdaan ng tao, tinitingnan lamang ang kanyang paninda ngunit wala ni isa man ang bumili. Sa kabiguan, hindi napigilan ni Lolo Jose na makaramdam ng matinding pagod, at unti-unting pumikit ang kanyang mga mata hanggang sa tuluyan siyang nakatulog.
Isang mabuting loob na mamimili ang lumapit sa kanya. Napansin nito ang kalagayan ni Lolo Jose at bagaman gusto niyang bilhin lahat ng ice cream para makauwi na ang matanda, kapos din siya sa pera. Napukaw ang kanyang damdamin at agad na ipinost sa social media ang sitwasyon ni Lolo Jose, nananawagan ng tulong mula sa mga tao.
“Sana matulungan natin si Lolo Jose. Dito siya madalas pumwesto sa Pardo Public Market sa Cebu City,” ang kanyang panawagan.
Sa tulong ng social media, maraming puso ang naantig at nagkaisa upang tulungan si Lolo Jose. Kinabukasan, bumalik siya sa kanyang pwesto ngunit sa pagkakataong iyon, hindi na siya nabigo. Dumagsa ang mga taong nag-abot ng tulong at bumili ng kanyang mga ice cream, nagbibigay kay Lolo Jose ng pagkakataong makapagpahinga at ngumiti muli.
0 Comments