Sa isang simpleng bayan sa Palawan, nagviral ang isang post sa social media na ibinida ang kahanga-hangang kasipagan ng magkapatid na sina Manuelita at Micko Borbon.
Matapos ang kanilang mga klase sa Palawan National High School, kung saan sila'y nasa ika-walo at ika-pitong baitang, diretso agad sila sa pwesto ng kanilang mga magulang upang tumulong sa pag-aayos ng mga sirang sapatos. Sa halip na makipaglaro gaya ng ibang bata, pinipili nilang tumulong para sa kanilang ikabubuhay.
Sa murang edad na 13 at 12 taong gulang, natuto silang mag-ayos ng sapatos sa pamamagitan ng pagmamasid sa kanilang mga magulang, sina Emmanuel at Mary Ann Borbon. Ang kanilang munting pwesto ng shoe repair ang pangunahing pinagkukunan ng pang-araw-araw na gastusin ng kanilang pamilya. Kahit na hindi laging marami ang nagpapagawa ng sapatos, pinagkakasya na lamang nila kung ano ang mayroon sa kanilang hapag.
Hindi alintana ang hirap, walang palya ang magkapatid sa pagtulong. Kahit sa murang edad, kitang-kita ang kanilang disiplina at pagiging responsable. Ayon sa kanilang ina, noon pa man ay masisipag na ang magkapatid, at kahit walang pormal na pagtuturo, natuto na silang mag-ayos ng sapatos sa kanilang sariling pagsusumikap.
Nakakabilib ang ipinapakitang ugali nina Manuelita at Micko. Sa kabila ng kanilang kabataan, nagsisilbi silang inspirasyon hindi lamang sa kanilang komunidad kundi pati na rin sa maraming netizens na nakabasa ng kanilang kwento. Sa bawat pagtahi at pag-aayos ng sirang sapatos, dala nila ang pangarap na makapagtapos ng pag-aaral at maiahon sa hirap ang kanilang pamilya.
0 Comments